ބީއެމްއެލް އިން 3،000 ހައުސިން ޔުނިޓް އަޅަނީ: ހުށަހެޅޭނީ ސަރުކާރުގެ ޕްރޮގްރާމަކުން

ބޭންކް އޮފް މޯލްޑިވްސް (ބީއެމްއެލް) އިން، ލީޒް-ޓު-އޯން އުސޫލުން އާންމުންނަށް ގެދޮރު ފޯރުކޮށްދިނުމަށް 3،000 ހައުސިން ޔުނިޓް އެޅުމަށް ސަރުކާރާއެކު އެއްބަސްވެއްޖެ އެވެ. މި މަޝްރޫ ހިންގުމަށް ބީއެމްއެލް އިން ވަނީ "ބީއެމްއެލް އެފޯޑަބަލް ހޯމް ލީޒިން ޕްރައިވެޓް ލިމިޓެޑް" ގެ ނަމުގައި ހާއްސަ ކުންފުންޏެއް އުފައްދާފަ އެވެ. މި އެއްބަސްވުމުގައި ބީއެމްއެލްގެ ފަރާތުން ސީއީއޯ އަހުމަދު ޝަރީފް ސޮއިކުރެއްވިއިރު، ސަރުކާރުގެ ފަރާތުން ސޮއިކުރެއްވީ ހައުސިން އެންޑް ކޮންސްޓްރަކްޝަން މިނިސްޓަރު އަބްދުﷲ މުއްތަލިބު އެވެ.

މި މަޝްރޫއުގެ ދަށުން ވިލިމާލޭގައި 300 ހައުސިން ޔުނިޓް އަދި ހުޅުމާލޭގެ ފޭސް 1 އާއި ފޭސް 3 ގައި 2،700 ހައުސިން ޔުނިޓް އަޅާނެ ކަމަށް މިނިސްޓަރު މުއްތަލިބު ވިދާޅުވި އެވެ. އަތްފޯރާނެ އަގެއްގައި މި ޔުނިޓްތައް އާންމުންނަށް ފޯރުކޮށްދިނުމުގެ ގޮތުން ސަރުކާރުން ބީއެމްއެލްއަށް ބިން ދޫކުރަނީ އެއްވެސް އަގެއް ނެގުމަކާ ނުލައި ހިލޭ ކަމަށްވެސް އޭނާ ފާހަގަކުރެއްވި އެވެ. މި ޔުނިޓްތަކުގެ އަގުތައް، މިހާރު ދޫކުރަމުން އަންނަ ހައުސިން ޔުނިޓްތަކުގެ އަގާ ގާތްގަނޑަކަށް އެއްވަރެއްގައި ހިފެހެއްޓޭނެ ކަމުގެ ޔަގީންކަން މިނިސްޓަރު ދެއްވި އެވެ.

ބީއެމްއެލްގެ ސީއީއޯ ޝަރީފް ވިދާޅުވި ގޮތުގައި މިއީ އާންމުކޮށް ދޫކުރާ ހޯމް ލޯނެއް ނޫނެވެ. މިއީ ލީޒް-ޓު-އޯން މޮޑެލްއެއް ކަމަށާއި، މި ސްކީމްގެ ދަށުން ގެއެއް ހޯދުމަށް ފުރަތަމަ ދައްކަންޖެހޭ ޑައުންޕޭމަންޓެއް ނުވަތަ އިކުއިޓީއެއް ބޭނުމެއް ނުވާނެ ކަމަށް އޭނާ ވިދާޅުވި އެވެ. ޝަރުތު ހަމަވާ ފަރާތްތަކަށް ކުލި ދައްކާ އުސޫލުން ޔުނިޓް ލިބޭނެ ކަމަށާއި، ކަނޑައެޅިފައިވާ ކުލީގެ މުއްދަތު ހަމަވުމުން އެ ޔުނިޓެއްގެ މިލްކުވެރިކަން އެ ފަރާތަކަށް ބަދަލުވެގެންދާނެ ކަމަށް ޝަރީފް ވިދާޅުވި އެވެ. މި ޔުނިޓްތަކަށް ހުށަހެޅުމުގެ ފުރުސަތު ހުޅުވާލާނީ ސަރުކާރުން އިއުލާންކުރާ ހާއްސަ ޕްރޮގްރާމެއްގެ ދަށުންނެވެ.