ވަކިކުރި ކަސްޓަމްސްގެ ޑެޕިއުޓީ ކޮމިޝަނަރުގެ ވަޒީފާ އަލުން ދިނުމަށް ރައީސަށް ލަފާ އަރުވައިފި

ރާއްޖެއަށް ވަގަށް އެތެރެކުރި ގިނަ އަދަދެއްގެ ސިނގިރޭޓާ ގުޅޭ މައްސަލައެއްގައި މަގާމުން ވަކިކުރި ކަސްޓަމްސްގެ ޑެޕިއުޓީ ކޮމިޝަނަރު މަހްމޫދު ރިޔާޒުގެ ވަޒީފާ އަލުން ދިނުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ރައީސް ޑރ. މުހައްމަދު މުއިއްޒަށް ލަފާ އަރުވައިފިއެވެ.

މިކަން ހާމަކުރެއްވީ އެ ކޮމިޓީގެ ނައިބު މުގައްރިރު، އިނގުރައިދޫ ދާއިރާގެ މެންބަރު އިބްރާހީމް ފަލާހުއެވެ. ފަލާހު ވިދާޅުވީ، ރިޔާޒު މަގާމުން ވަކިކުރުމަށްފަހު ކޮމިޓީއަށް ލިބުނު އިތުރު މައުލޫމާތުތައް ދިރާސާކުރުމުން، ސިނގިރޭޓު ވަގަށް އެތެރެކުރުމުގެ މައްސަލައިގައި އޭނާގެ ސީދާ ބައިވެރިވުމެއް ނެތްކަން ފާހަގަކުރެވިފައިވާ ކަމަށެވެ. އެހެންކަމުން، ރިޔާޒުގެ ވަޒީފާ އަލުން ދިނުމަށް ރައީސަށް ލަފާ އެރުވުމަށް ކޮމިޓީގެ އިއްތިފާގުން ނިންމާފައިވާ ކަމަށްވެސް އޭނާ ވިދާޅުވިއެވެ.

މިދިޔަ އަހަރުގެ އޮކްޓޯބަރު މަހު ހޯކްސް ކުންފުނީގެ ބޯޓަކުން ވަގަށް 200 މާސްޓާ ކާޓަން ސިނގިރޭޓު އެތެރެކުރި މައްސަލައާ ގުޅިގެން ރިޔާޒު މަގާމުން ވަކިކުރީ މިދިޔަ މަހުގެ 29 ވަނަ ދުވަހުއެވެ. ވަޒީފާއިން ވަކިކުރުމުން ރިޔާޒު ވަނީ އޭނާގެ ނަޒާހާތްތެރިކަމާމެދު ސުވާލު ނުއުފެއްދެވުމަށް އެދި، އެފަދަ ކޮރަޕްޝަންގެ އަމަލެއްގައި ބައިވެރިވެފައި ނުވާނެ ކަމަށް ވިދާޅުވެފައެވެ. މިކަމާ ގުޅިގެން ރައީސް އޮފީހުން އަދި ވަކި އެއްޗެއް ބުނެފައެއް ނުވެއެވެ.